تحدي الـ #30DaysOfCode
By Nabil Tharwat
الو, الووو! كل اللي بيكتب كود يجمع! 😃
من كام يوم في الستريم بتاعت Clash of Code قولت اننا هنعمل حاجة تخص الناس اللي شغالين على مشاريع او بيتعلموا حاجات جديدة, اول حاجة حابين نعملها ونبدأ بيها هي 30 Days of Code! 🥳
ايه ده؟
ده من اكتر التحديات المريحة اللي نقدر نعملها سوا كديفلوبرز. الفكرة بسيطة, على مدار 30 يوم كل يوم على الاقل تشتغل كوود ساعة. سواء بتتعلم حاجة او بتبني حاجة, المهم كل يوم تقعد ساعة تعمل حاجة بالكود. واللي شغال على بروجكت او بيتعلم حاجة جديدة يجي مثلاً كل فترة (يوم, يومين, 3 ايام, نص يوم, ايا يكن) و يتكلم عن الصعوبات والتحديات اللي بيواجهها, يطلب مساعدة من حد متابع الـ progress بتاعه, و هكذا.
كمان بيتزامن معاه Hacktoberfest وهو واحد من اكبر الفعاليات الاونلاين للمشاركة و الإسهام في المشاريع مفتوحة المصدر! الشهر ده هيبقى مليان و هنعمل حاجات كتيرة سوا, مستنيين ايه؟ لو عندكوا اصحاب مهتمين ابعتولهم لينك الانفايت دلوقتي https://discord.gg/xrGAnTg ولو حابين يعرفوا اكتر ابعتولهم الموقع بتاعنا https://valarium.netlify.app!
هتبقى حاجة مفيدة ازاي؟
احنا معروف عندنا ف البرمجة اننا بنبدأ المشاريع و نيجي ف النص او الاخر نغير البروجكت و نرمي كل حاجة, ودي حاجة انا شخصياً عملتها فوق ال 5 مرات لحد دلوقتي. ده بيحصل ليه؟ من ضمن اسبابه عن توفر الدعم النفسي او المادي اللي يخلينا نكمل حاجة. اه احنا نقدر نبدأ وكل حاجة, بس في ناس في حاجة ماسة للدعم النفسي اللي بيجي من حاجة زي دي, و ده اكبر فايدة نقدر نقدمها.
بجانب حاجات زي:
- هتحسنوا مهارة التعلم
- هتحسنوا التزامكم للي بتعملوه و احتياجكم للإلزام المشهّر هتقل
- هتبنوا عادات برمجية هتساعدكوا فيما بعد
- لو قضيتوها في بناء مشاريع هتعملوا بورتفوليو كويس
ازاي ابدأ؟ 👋
كل اللي عليكوا تخشوا تشانل Registration في السيرفر و تعملوا ريأكت على الرسالة الخاصة بالايفنت.
ازاي تحققوا اكبر قدر من الاستفادة
حددوا هدف و خريطة الـ30 يوم
الهدف ممكن يكون سواء تخلصوا مشاريع شغالين عليهم, او تتعلموا حاجة جديدة. الخريطة هتساعد انكوا متيضعوش وقت في ال30 يوم دول كل شوية مثلاً تدوروا على حاجة تعملوها او تفكروا عايزين تشتغلوا بإيه في البروجكتس بتاعتكوا.
تفاعلوا مع المجتمع
التحدي ممكن يبقى تقيل على ناس لما ميكونش معاهم صحابهم, وبالتالي ممكن يوقفوه. بس انا بقولكوا ان في حل احسن و هو انكوا تتعاملوا مع المجتمع و الناس اللي عاملين التحدي كأنهم اصحابكوا. اتكلموا كل يوم او يومين عادي, شوفوا وصلتوا لإيه, وهكذا.
اتحدوا اصحابكوا 😤
اي حاجة مع الاصحاب احلى بكتير, خصوصاً لو حاجة فيها التزام.
ابدأ التحدي علناً 👀
نزلوا مثلاً على فيسبوك او تويتر على حساباتكوا انكوا بدأتوا التحدي ده. ده هيزود فرص ان اصحابكوا يجوا معاكوا و هيزود التزامكم.
اختاروا حاجات عايزين تعملوها فعلاً
يعني مثلاً فكرة مرمية على الجنب, حاجة بقالكوا فترة عايزين تتعلموها, بروجكت مش كامل, و هكذا. متعملوش التحدي لمجرد انكوا تعملوه.
خلوا المشاريع اللي هتشتغلوا عليها public 💻
ويا سلام لو عملتوهم open source. هتشيلوا مسؤولية اكبر انكوا تحافظوا على مستوى نضافة الكود و الحاجات اللي احنا عارفينها. كمان ممكن لو حد متابع او من اصحابكوا و ماشي معاكوا في التحدي يخش يشوف الكود الاوبن سورس ده ويديك نصايح او يسألك على حاجات فيه. win-win بالنسبة لي.
سجلوا كل حاجة 📔
اعملوا journal على برنامج زي Notion مثلاً او اي برنامج نصوص تاني وسجلوا الـ progress بتاعكوا كل يوم. عملتوا ايه, واجهتوا صعوبات ايه, اتعلمتوا ايه, وهكذا. ممكن في الاخر بقى تلموا كل ده و تكتبوا بيه مقالة تنزل عندنا ع البلوج 😄
حاولوا متعملوش skip ليوم 💪
كل اما زاد التزامكم بالتحدي كل اما يزيد الاستفادة. حاولوا تكملوا ال30 يوم فعلاً كل يوم بتبرمجوا. ممكن عادي لو حصل ظرف او تعبتوا نفسياً او جسدياً تريحوا يوم, بس حاولوا تعوضوا
في اخر التحدي بصوا وراكوا 🎖️
شوفوا انتوا خلصتوا ايه في خلال ال30 يوم دول, ايه اللي محتاج يتغير في عاداتكوا, محتاجين تحسنوا ايه, فخورين بإيه. الاستفادة من التحدي ده كبيرة جداً.
متخافوش من الفشل 😔
عادي ممكن تزهقوا ومتلاقوش داعي تكملوا, ممكن متقدروش تعملوا كده كل يوم, ممكن متقدروش تشيلوا الالتزام ده فوق الالتزامات الكتير اللي بتتحط على اكتافنا كل يوم. ده طبيعي, متخافوش ولا تيأسوا منه. اتعلموا من تجربتكم حتى لو كانت يومين. بعد كده حطوا هدف انكوا تستمروا اسبوع, بعد كده اسبوعين, وهكذا. حاولوا, افشلوا, اتعلموا, حاولوا تاني.
الإرهاق Burnout
من اكبر العقبات في التحدي ده هي الـ burnout. لما بتعملوا حاجة بإلتزام لفترة طويلة و بسرعة زيادة عن مقدرتكم بيزيد الارهاق و ممكن يوصل لـ burnout. عشان كده حاولوا تمشوا بسرعتكوا المريحة. ده مش سباق زي ما قولت, مش لازم تخلصوا بروجكت كامل في الـ 30 يوم. ممكن عادي تقسموا البروجكت على مرتين. تخلصوا اول 30 يوم, تستريحوا شوية, و تبدأوه تاني بعدين, و هكذا. انا عن نفسي عملت كده بس كانت 100 يوم 😂
التشالنج ده موجود على تويتر بإسم 100 Days of Code و ناس كتير كل يوم بينضموا ليه, بس احنا حسينا ان 30 يوم وقت انسب لعمل مشاريع تعليمية صغيرة مثلاً او اخد فكرة عن حاجة معينة فا قررنا نمشي مع 30 يوم بدل الـ 100, على الاقل في مجتمعنا فقط.
كمان طول ما التحدي شغال هنعمل ايفنتس تانية عشان نشجعكوا تشتغلوا و تتحسنوا اكتر. مستنييكم في التحدي ده. برمجة سعيدة! 🥳